Lati ṣiṣẹ olutumọ-ede

Gbogbo iṣẹ ni o ni iyi tirẹ. Iṣẹ olutumọ ede jẹ iṣẹ ti o dara. Iṣẹ ole ni o ba ọmọ jẹ, gẹgẹ bi awọn Yoruba ti ṣe ma nsọ. Iṣẹ olutumọ ede jẹ iṣẹ ti yoo fun eniyan ni anfaani lati le ṣe nkan miiran. Yoo fun eniyan ni owo ati ifọkanbalẹ pẹlu, ṣugbọn kii ṣe owo ọfẹ rara. Owo ti eniyan yoo ṣiṣẹ fun ni. Owo ti o nwa lati ibi ki eniyan tumọ ede kii ṣe owo awufuu. Eniyan nlati ṣiṣẹ ki o to le ri owo gba ni. Bi o ba ṣiṣẹ fun eniyan kan, o le to laarin osẹ meji, oṣu kan, oṣu mẹta tabi ju bẹẹ lọ ki eniyan to ri owo gba. Eyi dale lori akọsilẹ ile-iṣẹ ti eniyan baa ṣiṣẹ ba ṣe ri.

Bawo ni eniyan ti ṣe le ṣe iṣẹ olutumọ ede? Ikinni ni lati mọ ede abinibi ẹni sọọ ati lati le kọọ daradara. Ekeji ni lati mọ ibiti iṣẹ ti eniyan fẹ ṣe naa wa. Bawo ni eniyan yoo ṣe ti ri awọn iṣẹ wọnyii? Orilẹ-ede Naijiria jẹ eyiti o tobi pupọ ti o si ni awọn anfaani ti o pọ lọpọ yanturu bakanna. Ọpọlọpọ awọn orile-ede ti wọn nṣe ohun kan tabi omiran ni wọn nfẹ lati taa ni orilẹ-ede wa. Ọna kan pato lati jẹ ki awọn ọja wọn wọnyii ta tabi niyi ni oju awọn eniyan wa ni lati kọọ ni ede abinibi awọn eniyan wa, paapaa ni awọn ede mẹta ti o wọpọ julọ ni orilẹ-ede wa: Hausa, Yoruba ati Igbo.

Ibiti eniyan yoo ti ri ọpọlọpọ awọn iṣẹ yii ni lori ayelujara (Internet). Awọn ipo kan wa lori ayelujara ti awọn eniyan ti wọn ni iṣẹ kan tabi omiran lati ṣe ti wọn ti maa nfi lọ pe awọn nwa eniyan ti oni-imọ lati ṣee. Ọkan ninu awọn ibi ti eniyan ti le ri awọn iṣẹ wọnyi ni www.proz.com, tanslationdirectory.com, traduguide.com ati bẹẹ bẹẹ lọ. Eniyan yoo ni lati kọkọ fi orukọsilẹ lori ipo yii ki eniyan to le gba iṣẹ nibẹ. A ni awọn ti o nsan owo lati fi orukọ silẹ ni ipo ayelujara yii bẹẹ si ni awọn ti kii san owo wa. Awọn ti o ba nsan owo ni awọn anfaani kan ti ẹni ti kii san owo ko ni, ti ko si le ni rara. Tẹlẹ tẹlẹ bakanna, ẹniti o ba forukọsilẹ ni ipo yi le gba iṣẹ laijẹ ọmọ ẹgbẹ ti o nsan owo. Ṣugbọn ki o to le gba iṣẹ lori ipo yii nisinyi owo dola kan ($1) ni eniyan yoo fi ja (bid) fun iṣẹ yii.

Iṣẹ́ ni òògùn ìṣẹ́

Iṣẹ́ ni òògùn ìṣẹ́,
Múra sí iṣẹ́ rẹ ọrẹẹ mi.
Iṣẹ́ ni a fií ndi ẹni gíga.
Bí a kò bá rẹni fẹyìn tì,
Bí òlẹ làá rí.
Bí a kò bá rẹni gbẹkẹlẹ,
À tẹra mọ iṣẹ́ ẹni.
Ìyá rẹ lè lówó lọwọ,
Ki bàbá rẹ sì lè lẹsin lékan,
Bí o bá gbójú lé wọn;
O tẹ tán ni mo sọ fún ọ.
Ohun tí a kò bá jìyà fún,
Kìí lè tọjọ.
Ohun tí a bá fara ṣiṣẹ fún,
Níí pé lọwọ ẹni.
Apá lará, ìgùnpá nì’yekan.
Bí ayé ba nfẹ ọ lónìí,
Bí o bá lówó lọwọ ní,
Wọn á máa fẹ ọ lọla.
Tàbí tí o bá wà ní ipò àtàtà,
Ayé á yé ọ sí tẹrin-tẹrin,
Jẹ kí o di ẹni ti nráágó,
Kí o rí báyé tií yímú sí ọ.
Ẹkọ sì tún nsọnií dọgá,
Múra kí o kọọ dáradára.
Bí o sì rí ọpọ ènìyàn,
Tí wọn nfi ẹkọ ṣe èrín rín,
Dákun má ṣe f’ara wé wọn.
Ìyà nbọ f’ọmọ tí kò gbọn,
Ẹkún nbẹ f’ọmọ tó nsá kiri.
Má f’òwúrọ ṣeré, ọrẹẹ mi,
Múra ṣiṣẹ, ọjọ nlọ.

Amuyẹ fun titumọ ede

Olutumọ ede gbọdọ ni oye pipe nipa ohun ti onkọwe ede ti o ntumọ nsọ ati ete ti onkọwe ni.

Olutumọ ede gbọdọ ni oye pipe nipa ede ti o ntumọ si ati oye ti o tayọ nipa ede ti a fi kọwe eyiti o ntumọ.

Olutumọ ede gbọdọ yẹra fun titumọ ede nipa lilo ọrọ fun ọrọ nitori ṣiṣe eyi le da erongba onkọwe ọrọ ti a tumọ si ede miran ru.

Olutumọ ede gbọdọ lo ede ti o wọpọ ki ọrọ ti o ntumọ baale le ye awọn oluka rẹ.

Nipa tito ọrọ ti o ba yan, olutumọ ede gbọdọ gbiyanju lati jẹ ki ọrọ ti ohun ntumọ ni iro ati ipa ti o tọ.